Таҙалыҡты арттырыуға – 30 млрд һум

Сараларҙы “Экология” милли проектының “Саф һауа” федераль проекты сиктәрендә тормошҡа ашырыу планлаштырыла.

Башҡортостан предприятиелары производствоны модернизациялауға һәм уның таҙалығын арттырыуға 2024 йылға тиклем 30 млрд һумдан ашыу аҡса сарыф итәсәк. Шулай уҡ “Экология” милли проекты буйынса һауа сифатын яҡшыртыу маҡсатында газомоторлы транспорт һатып алынасаҡ.

“Саф һауа” төбәк проекты эшләнгән. Был проектта республикала эшләүсе предприятиеларҙың производствоны модернизациялауы һәм һауа һаҡлау сараларын үтәүе иҫәбенә атмосфера һауаһы сифатын яҡшыртыу күҙаллана. Биш йылға улар 32 млрд һумлыҡ саралар башҡарасаҡ. Бынан тыш, газомоторлы яғыулыҡта эшләүсе 74 автобус һатып алыу планлаштырыла, улар Өфө буйлап йөрөйәсәк. 4 газ станцияһы төҙөләсәк. Башҡортостандың Сәнәғәт министрлығы мәғлүмәттәренә ҡарағанда, әле төбәктә 16 автомобиль газ тултырыу компрессор станцияһы эшләй, 2022 йылға тиклем уларҙың һанын 33-кә еткереү ниәтләнә. Милли проект сиктәрендә Салауат, Сибай һәм Учалы ҡалаларында автоматлаштырылған атмосфераны күҙәтеү пункттары барлыҡҡа киләсәк.

#национальныепроекты