Күп балалы Йосоповтар ғаиләһе байрам менән ҡотлай

Бөгөн 2019 йылдың һуңғы көнө булыуына ышанғы ла килмәй. Район халҡын Фёдоровка районы Фёдоровка ауылында йәшәүсе Йосоповтарҙың күп балалы ғаиләһе ҡотлай.

Илнур Хәмит улы менән Эльвира Мөхәммәт ҡыҙы Йосоповтар- өс малайҙың ата-әсәһе федоровкаларға йылы теләктәрен юллай. “Яңы йылда барығыҙға ла сәләмәтлек, ҙур уңыштар теләйбеҙ. Иң мөһиме ғаиләләрҙә мөхәббәт, аңлашыусанлыҡ булһын, һәр кем үҙ парын

Һәр кем өсөн ғаилә терәк- таяныс булыуын Йосоповтар үҙ тәжрибәһендә аңлаған. Күп йылдар улар иңде-иңгә терәп, бер-береһенең, балаларының уңыштарына ҡыуанып йәшәп килә. Айырыуса балалары - йәшәү сығанаҡтары, нәҫелде дауам итеүселәр уларға илһам бирә. Малайҙар әленән үк эшкә өйрәнеп үҫә, атай-әсәйҙәренә булыша. Өлкән улдары Данир- Фёдоровка 1-се мәктәбенең алтынсы синыф уҡыусыһы, көрәш менән шөғөлләнә. Илдан беренсе синыфта уҡый, ул йырларға ярата, бейеү түңәрәгенә йөрөй. Быға аптырайһы юҡ, атай-әсәйҙәре лә ижади, талантлы кешеләр. Полиция көнө байрамдары уларҙан башҡа үтмәй. Илнур- полиция хеҙмәтендә водитель, матур бейей, хорҙа йырлай, ә миграция пункты инспекторы Эльвира моңло тауышы менән кешеләрҙең күңелен арбай. Әле ул декрет ялында, бер йәшлек улдары Илназды тәрбиәләй.

Күп балалы ғаиләнең мәшәҡәттәре лә етерлек, өҫтәүенә, мал- тыуар аҫрайҙар, баҡса үҫтерәләр. Ҡәҙимге тормоштарынан Йосоповтар ҡәнәғәт. “Лайыҡлы йәшәү өсөн көс һалмай булмай, шуға ла һөҙөмтәһе лә оҙаҡ көттөрмәй. Эргәңдә бер һуҡмаҡтан, иңгә-иң терәп атлаусы кешең булғанда тормош йәмле, балалар ҙа шат”,- тиҙәр Илнур менән Эльвира.

Йосоповтарҙың ғаиләһендә һәр саҡ татыулыҡ, берҙәмлек булыуын теләйбеҙ. Яңы йыл тик уңыштар ғына килтерһен.