Башҡортостандың III Ата-әсәләр форумында мәктәптәрҙә тематик шәмбеләр варианттары буйынса фекер алыштылар

Кисә Өфөлә үткән Башҡортостандың өсөнсө Ата-әсәләр форумының пленар ултырышында ҡатнашыусылар, биш көнлөк уҡыу аҙнаһына күскәндән һуң, мәктәптәрҙә тематик шәмбеләр үткәреү буйынса үҙҙәренең фекерҙәрен белдерҙе. Ғаилә туристик походтары йәки экология шәмбеһе үткәреү идеяһы яңғыраны, уның ваҡытында балаларҙы сүп-сарҙы айырып йыйыуға, тәбиғәт ресурстарын һаҡларға, хайуандарға һәм йорт хайуандарына ҡарата йылы мөнәсәбәт тәрбиәләргә мөмкин буласаҡ. Мәҙәни шәмбелә уҡыусылар өсөн театрҙарға йәки музейҙарға сәйәхәттәр, әҙәби ҡунаҡханалар ойошторорға, башҡорт яҙыусыларының әҫәрҙәрен өйрәнергә мөмкин.“Сәләмәт шәмбене” стресҡа ҡаршы тороу, психология, сәләмәт туҡланыу һәм сәләмәт тормош рәүеше буйынса дәрестәргә бағышларға була. Ата-әсәләр мотлаҡ рәүештә “Патриотик шәмбе” булырға тейеш тип һанай, унда балалар өсөн Бөйөк Ватан һуғышы ветерандары менән осрашыуҙар, төрлө акциялар ойошторорға мөмкин.“Шәмбе тулы бер ваҡиға булырға, уҡыусылар уны түҙемһеҙләнеп көтөп алырға тейеш. Был күп ваҡытта уҡытыусыларҙан ғына түгел, ата-әсәләрҙең үҙәренән дә тора”, - тине Радий Хәбиров.Бөтәһе уҡыу йылы барышында 32 шәмбенән һигеҙ тематик шәмбе үткәреү ниәтләнә. Төбәк башлығы мәктәп уҡыусыларына ҡыҙыҡлы булһын өсөн темаларҙы яҡшылап уйларға кәрәк, ти.

"Башинформ" мәғлүмәт агентлығы материалдары буйынса.