1989 йылдың 15 февралендә Афғанстандан ғәскәрҙәрҙе сығарыуға бағышлап, Бала Сытырман ауылы мәктәбенең 8-10 синыф уҡыусылары өсөн Бала Сытырман СМФК хеҙмәткәрҙәре “Афғанстан – күңелем яраһы һин...” тигән сара ойошторҙо.
Беҙҙең өсөн был тема – мәңгелек төҙәлмәҫ яра: беҙҙең ауылда ла һуғыштың нимә икәнлеген ишетеп кенә белмәгән, 18-19 йәшлек улдарын һуғышҡа оҙатҡан һәм көтөп ала алмаған ғаиләләр йәшәй. Балалар һуғыш, ауылыбыҙҙың афған һуғышында ҡатнашҡан яуғирҙәре – Сыуаҡаев Рим, Быков Сергей, Әминев Илшат, Ишҡолов Малик тураһында тыңланылар. Шулай уҡ ул ваҡыттағы видеоларҙы: шат, йылмайған, бәхетле йөҙҙәрҙе ҡаранылар. Алыштар, юғалтыуҙар, дошмандарҙың утҡа тотоуҙары – бөтәһе лә артта ҡалған. Тик бөтәһе лә был бәхетле көнгә ҡәҙәр иҫән ҡала алмаған. Сара рядовой Сыуаҡаев Рим ҡәберенә сәскә һалыу менән тамамланды.