Фёдоровка районы Әтәс ауылында әүҙем тормош рәүеше алып барырға тырышалар

Ошо көндәрҙә Раушан Ғәйнуллина менән Зөлминә Ханнанова “Сердәш” клубы ултырышын ойошторған. Активист ҡатындар алдағы байрамдарға әҙерлек тураһында һөйләшкән. Ағымдағы мәсьәләләрҙе етди ҡарағандан һуң, конкурстарҙа ҡатнашҡан. Викториналағы аш-һыу, баш кейемдәре, кейем-һалым темаһына ҡағылышлы һорауҙарға һәр дөрөҫ яуап өсөн жетондар алғандар. Бында Насирова Гөлфара еңгән. Күңелле кисә сәй өҫтәле артында тамамланған.

Элек-электән клубтар ауылдарҙың үҙәге- “йөрәге” булған, унда йәштәрҙең, ауыр хеҙмәттән һуң ололарҙың ялы ойошторолған. Ауыл халҡы бөтә мәшәҡәттәрен онотоп, ял иткән. Әтәс ауылында мәктәп ябылғас, бөтә саралар клубта һәм китапханала үткәрелә.