Белем - баһалап бөткөһөҙ байлыҡ

Һуңғы ваҡытта район почта бүлексәләренең күпселегендә гәзиткә яҙылыусылар һанының кәмеүе һәм планды үтәүе ауырайғандан-ауырая барыуы хаҡында күп ишетелә. Шуға ла Балыҡлы почта бүлексәһендә тиҫтәнән ашыу республика һәм район баҫмаларына яҙылған ғаилә тураһында ишеткәс, был ғаилә менән танышҡым килде.

Өйҙә хужабикә Фатима апай Латипова ғына ине. Тормош иптәше Рәфҡәт ағай яңы гәзиттәрҙе уҡып сыҡҡандан һуң балыҡҡа киткән икән. Ә ҡатыны гәзит- журналдар ятҡан өҫтәл артында ултыра ине.

Баҡһаң, яңы йылдан был ғаиләгә 15-тән ашыу баҫма киләсәк, шулар араһында “Ашҡаҙар таңдары”- иң яратҡаны. Гәзит-журнал алдырыуға пенсиянан күпме аҡсалары китеүен һораныҡ. “Ғәҙәттә киң күләм мәғлүмәт сараларын яҙҙырыуға 4000-5000 һум аҡса тотонабыҙ. Әммә шуның бер тинен дә йәлләмәйбеҙ. Донъяла, илдә, республикала ниҙәр булғанын, райондағыһын әйтеп тораһы ла юҡ, белмәйенсә нисек йәшәп була?” – тине ул. Яҙҙырып алғандарынан тыш, Фатима апай почтальондар һатырға алып килгән гәзит-журналдарҙы ла бик теләп ала.

Әңгәмәбеҙ аҙағында хужабиә гәзиткә яҙылыусыларҙың әүҙемерәк булыуын теләне, район гәзитенә һис шикһеҙ яҙылырға һәм барлыҡ яңылыҡтарҙы белеп торорға кәңәш итте.